Lucid 50 ming dollardan arzon Cosmos elektromobili tizerini koʻrsatdi
Lucid elektr krossoveri Cosmosga bagʻishlangan boʻlishi mumkin boʻlgan tizer chiqardi. Model ishlab chiqarilishi 2027 yilning ikkinchi yarmida kutilmoqda.
Lucid X tarmogʻida avtomobil tasvirlangan videoni eʼlon qildi. U, ehtimol, Cosmos elektr krossoveriga aylanadi. Videoda avval faqat kamuflyajlangan prototiplarda koʻrilgan modelning old va orqa chiroqlari ilk bor batafsil namoyish etildi.
Avtomobilning orqa qismida yukxona eshigidagi qizil harflar bilan yoritilgan LUCID yozuvi, ingichka yorugʻlik chiziqlari va orqa oynaning tagidagi spoyler koʻrinadi. Old tomonda esa vertikal segmentlarga ega shakldor LED fara oʻrnatilgan. Bu dizayn Lucid kompaniyasi Yevropada roʻyxatdan oʻtkazgan Cosmos eskiziga mos keladi.
Kompaniya Cosmos va Earth modellari boʻyicha rejalarini mart oyida taqdim etgan. Har ikkala avtomobil yangi oʻrta oʻlchamli platformada quriladi, boshlangʻich narxi esa 50 ming dollardan past boʻlishi kerak — Gravity narxidan taxminan ikki baravar kam.
Lucid maʼlumotiga koʻra, Cosmos sigʻimi 69 kVt·soat boʻlgan batareya bilan taxminan 300 mil masofa bosa oladi. Ishlab chiqaruvchi avtomobil 14 daqiqalik quvvatlashdan soʻng yurish zaxirasini 200 milga oshira olishini ham bildirgan. Yangi Atlas kuch qurilmasida detallar soni 30 foizga kam, uning narxi esa Gravityʼda oʻrnatilgan Zeus agregatinikidan 37 foizga arzon.
Dastlab Cosmos ishlab chiqarishini 2026 yil oxirida boshlash rejalashtirilgan edi. Avgust oyida Lucid bosh direktori Silvio Napoli ishga tushirishni 2027 yilga, ehtimol uning ikkinchi yarmiga koʻchirdi. Kompaniya eʼlon qilingan videoda avtomobil nomini hozircha aytmagan, shu sababli uning Cosmos bilan bogʻliqligi rasmiy tasdiqlangan emas, balki ehtimoliy boʻlib qolmoqda.
