Yangwang U9 Xtreme 503,17 km/soatga erishib, jahon rekordini eʼlon qildi
Elektr superkar Yangwang U9 Xtreme Abu-Dabidagi umumiy foydalanishdagi yoʻllarda 503,17 km/soatga erishdi. Brend bu natijani seriyali avtomobillar uchun jahon rekordi deb atadi.
Abu-Dabidagi maksimal tezlik sinovida U9 Xtreme modelining Germaniyadagi ATP poligonida qayd etilgan avvalgi sertifikatlangan natijasi — 496,22 km/soat — yangilandi. Brend yangi tezlik jahon rekordiga aylanganini maʼlum qildi.
Superkar butun dunyo boʻylab 30 dona bilan cheklangan seriyada ishlab chiqariladi. Uning toʻrtta elektr motori har biri 555 kVt quvvat beradi, umumiy choʻqqi quvvati esa 2 220 kVtga yetadi. Har bir dvigatel daqiqasiga 30 000 martagacha aylana oladi.
2025-yil sentabrida U9 Xtreme Nyurburgringning Shimoliy halqasini 6 daqiqa 59,157 soniyada bosib oʻtdi. Model bu aylanani yetti daqiqadan kam vaqtda bosib oʻtgan birinchi seriyali elektromobil boʻldi.
Avtomobilning seriyali versiyasi aprel oyida Pekin avtosalonida taqdim etildi. Uning narxi bir dona uchun 20 mln yuandan oshadi. 500 km/soatdan yuqori tezlikda harakatlanish uchun avtomobil 1 200 voltlik yuqori kuchlanish platformasi, 30C quvvat bilan razryadlanishni qoʻllab-quvvatlovchi Blade batareyasi, mustaqil BYD e4 yuritmasi, DiSus-X kuzovni faol boshqarish tizimi, kuchaytirilgan titan-karbon-keramika tormoz tizimi va maxsus yarim silliq shinalar bilan jihozlangan.
Standart Yangwang U9 Xitoyda 2024-yil fevralidan beri sotilmoqda. Uning toʻrtta elektr motori har biri 240 kVt quvvat beradi, boshlangʻich narxi esa 1,8 mln yuanni tashkil etadi.
