Oʻzbekiston davlat shifoxonalari 2027-yildan xizmatlarni autsorsingga oʻtkazadi
Shavkat Mirziyoyev davlat tibbiyot muassasalarini 2027-yil boshidan tibbiy va yordamchi xizmatlarni autsorsing asosida koʻrsatishga oʻtkazishni tasdiqladi. Shartnomalar odatda besh yilgacha muddatga tuziladi.
Oʻzbekiston prezidenti 4-noyabr kuni xususiy sektorni sogʻliqni saqlashni rivojlantirishga jalb etish toʻgʻrisidagi qarorni imzoladi. Hujjat Lex.uz saytida eʼlon qilindi.
Tibbiy va yordamchi xizmatlarni xarid qilishning yangi tartibi 2027-yil boshidan amal qila boshlaydi. Xususiy yetkazib beruvchilar bilan shartnomalar xizmat turiga va kutilayotgan investitsiyalar hajmiga qarab tuziladi. Ayrim hollarda kelishuv muddati 10 yilgacha boʻlishi mumkin — agar Sogʻliqni saqlash vazirligi bunday muddat kiritilgan mablagʻlarni qoplash uchun zarur ekanini tasdiqlasa.
Davlat va biznes hamkorligi qisqa va uzoq muddatli master-rejalar asosida yoʻlga qoʻyiladi. Xususiy ishtirokchilar hududlardagi tibbiy xizmatlarga boʻlgan ehtiyoj, shuningdek davlat va nodavlat klinikalarning mavjud quvvatlari hisobga olingan holda jalb etiladi.
Davlat kafolatlangan tibbiy yordam koʻrsatish uchun zarur muassasalarni saqlab qoladi. Master-rejalar ularning quvvatlarini real talabga muvofiq rivojlantirishni taʼminlashi kerak. Ayrim klinikalarga ish samaradorligini oshirish hamda zamonaviy boshqaruv usullari va klinik texnologiyalarni joriy etish uchun professional boshqaruvchilarni jalb qilish ham rejalashtirilmoqda.
28-oktabr kuni boʻlib oʻtgan taqdimotda davlat klinikalari xaridlarida autsorsing ulushini 2030-yilga borib 30 foizga yetkazish maqsad qilib belgilandi. Taklif etilayotgan mexanizm uzoq muddatli shartnomalar tuzish, ishni aniq mezonlar asosida baholash hamda xizmatlar va kelishuvlarni hisobga olish, sifatni nazorat qilish va toʻlovlarni amalga oshirish uchun elektron tizim joriy etilishini nazarda tutadi.