Shavkat Mirziyoyev Rustami Emomaliga «Fidokorona xizmatlari uchun» ordenini topshirdi

4-noyabr kuni Shavkat Mirziyoyev Oʻzbekistonga rasmiy tashrif bilan kelgan Rustami Emomalini qabul qildi. Tojikiston parlamenti raisi unga Tojikiston Prezidenti Emomali Rahmonning salomi va ezgu tilaklarini yetkazdi.

Tomonlar Oʻzbekiston va Tojikiston oʻrtasidagi munosabatlarni, jumladan, parlamentlararo hamkorlikni yanada rivojlantirish masalalarini muhokama qildilar. Xabarda oʻzaro savdo va yuk tashish hajmi oshgani, shuningdek, sanoat, qurilish, energetika, qishloq xoʻjaligi va elektrotexnika sohalarida qoʻshma loyihalar amalga oshirilayotgani qayd etiladi. Qoʻshma Investitsiya kompaniyasining faoliyati ham alohida taʼkidlandi.

Uchrashuv ishtirokchilari poytaxtlar va hududlar oʻrtasidagi toʻgʻridan-toʻgʻri aloqalar, madaniy, gumanitar, taʼlim va turizm sohalaridagi almashinuvlarni kengaytirish masalalarini ham muhokama qildilar. Qonun chiqaruvchi organlarga ikki mamlakat yetakchilari erishgan kelishuvlarni parlamentlararo komissiyalar, doʻstlik guruhlari va soha qoʻmitalari orqali amalga oshirishda faolroq ishtirok etish taklif qilindi.

Mukofot Oʻzbekiston va Tojikistonning strategik sherikligi va ittifoqchiligini mustahkamlashga qoʻshgan hissasi, shuningdek, parlamentlararo muloqotni rivojlantirgani uchun topshirildi.